Átök á Suðurlandsvegi

Til átaka kom um ellefuleytið á milli lögreglu og vörubílstjóra á Suðurlandsvegi og hafa nokkrir menn þegar verið handteknir.

Að sögn fréttamanns Stöðvar 2 kom til átaka þegar lögregla hugðist fara inn í bíl sem stóð á vegnum og beitti lögregla bæði kylfum og táragasi í aðgerðunum. Tugir lögreglumanna eru á staðnum og róaðist ástandið nokkuð eftir fyrstu átök.

Hins vegar var enn stál í stál á veginum og skömmu eftir átökin tóku lögreglumenn á rás og réðust gegn einum manni og handtóku hann að sögn fréttamanns Stöðvar 2. Einhver hópur manna hefur verið fluttur á brott í sjúkrabíl eftir að hafa fengið táragas í augun en aðgerðum á staðnum er ekki lokið. Einn lögreglumaður mun hafa meiðst þegar hann fékk einhvern hlut í höfuðið. Eins og gefur að skilja er Suðurlandsvegur lokaður vegna aðgerðanna og verður eitthvað áfram að sögn lögreglu.

Fréttamaður Stöðvar 2 fékk þær upplýsingar að Sturlu Jónssyni, talsmanni vörubílstjóra, hefði verið komið á öruggan stað til þess að hann geti tjáð sig um málið. Þá berast fregnir af því að vörubílstjórar hyggist færa mótmælin að mótum Kringlumýrarbrautar og Miklubrautar.