Megas blæs nýju lífi í gamla slagara

Síðastliðinn fimmtudag, þann 3. júlí, hélt Megas ásamt Senuþjófunum tónleika í Höllinni í Vestmannaeyjum við frábærar undirtektir heimamannanna. Alls sóttu rúmlega 600 manns tónleikana sem voru þeir fyrstu sem Megas hefur haldið í Eyjum í 20 ár og því ekki nema von að hans hafi verið beðið með eftirvæntingu.

Það styttist einnig í að ný plata Megasar og Senuþjófanna komi út en hún er væntanleg í verslanir á allra næstu dögum. Platan, sem er tökulagaplata, ber nafnið "Á morgun" og inniheldur 16 lög sem eru Megasi kær. Eins og Megasi einum er von og visa fer hann afar óvenjulega með lögin þannig að þau öðlast nánast algjörlega nýtt líf.

Megas og Senuþjófarnir halda tónleika á Draugabarnum á Stokkseyri næst komandi laugardag, 12. júlí. Tónleikarnir eru haldnir í tengslum við Bryggjuhátíðina og hefjast klukkan 21:00.