Deiliskipulag á brunareit auglýst

Skipulagsráð borgarinnar samþykkti á fundi sínum í dag að auglýsa deiliskipulag fyrir tvo reiti í miðborginni, annars vegar Kvosina þar sem bruninn varð í fyrra og hins vegar tvær lóðir á Vegamótastíg.

Fyrrnefndi reiturinn nefnist Pósthússtrætisreitur og afmarkast af Pósthússtræti, Skólabrú, Lækjargötu og Austurstræti. Eins og kunnugt er efndi borgin til hugmyndasamkeppni um skipulag reitsins og náðist mjög góð samstaða um vinningstillöguna sem nú hefur verið færð í deiliskipulagstillögu. Fram kemur í tilkynningu frá skipulags- og byggingarsviði að tillagan taki gott mið af verndun sögufrægra bygginga og uppbyggingu til eflingar fyrir Kvosina.

„Markmið deiliskipulagsins er að sýna byggingararfinum þann sóma sem honum ber en aðlaga húsin jafnframt að nútímaþörfum eins og hægt er. Miðað er við að gömlu húsin verði færð til eldra horfs eða lagfærð. Miklar kröfur eru gerðar til hönnunar og um frágang. Einnig er gert ráð fyrir því að Nýja Bíó verði endurreist á svipuðum stað og það áður stóð," segir í tilkynningunni.

Samkvæmt tillögunni er gert ráð fyrir gönguleið í gegnum miðjan reitinn frá Austurstræti til Skólabrúar og tengingum út í Lækjargötu og Pósthússtræti. Skjólgóð almenningsrými verða til með torgi á bak við Jómfrúna auk þess sem einn elsti garður landsins, Landfógetagarðurinn, verður endurvakinn og gerður aðgengilegur fyrir almenning.

Þá ákvað skipulagsráð að auglýsa breytingartillögu fyrir Vegamótastíg 7-9 sem felur í sér að byggt verði á lóðunum nokkurn veginn í samræmi við fyrra deiliskipulag. Aftur á móti verður á þaki byggingarinnar endurreistur lítill steinbær "Herdísarbær" sem áður stóð á Vegamótastíg 7 og var rifinn seint á sjöunda áratug síðustu aldar og sömuleiðis verður gamla timburhúsið á Vegamótastíg 9 flutt upp á þak.

Skipulagsráð samþykkti einnig á fundi sínum að afmarkað verði sérstakt kjarnasvæði miðborgar sem tekur mið af landnotkun í Aðalskipulagi Reykjavíkur. Afmörkunin yrði byggð á þeirri skilgreiningu sem fram kemur í Þróunaráætlun miðborgar.

Tilgangur afmörkunarinnar er sá að undirstrika og styrkja byggingarsögulegt samhengi miðborgarinnar og einkenni svæðisins ásamt því að leggja aukna áherslu á þær kröfur sem Reykjavíkurborg gerir til lóðarhafa á svæðinu og til sjálfs síns sem yfirráðaraðila gatna og rýmisins á milli húsa.