Hefur sárasjaldan notað einkaflugvél á ráðherraferli

Til harðra orðaskipta kom á milli Geirs H. Haarde forsætisráðherrra og Ögmudnar Jónassonarm, þingflokksformanns Vinstri - grænna, við upphaf þingfundar í dag vegna einkaflugvélamála. Sagðist ráðherra aðeins hafa notað slíkan fararmáta sárasjaldan.

Ögmundur kvaddi sér hljóðs við upphaf þingfundar í dag og benti á fréttir af því að Geir H. Haarde forsætisráðherra og Björgvin G. Sigurðsson viðskiptaráðherra væru á leið til útlanda í einkaflugvél. Það gerðist nokkrum dögum eftir að fréttir hefðu borist af forsætisráðherra og Ingibjörgu Sólrúnu Gísladóttur utanríkisráðherra í ferð til Búkarest á leiðtogafund, en þangað fóru þau einnig í einkaflugvél.

Hvaða skilaboð felast í einkavélunum?

Gagnrýndi Ögmundur pukur í tengslum við ferðirnar. Sagði hann forsætisráðherra og utanríkisráðherra hafa réttlætt flottræfilsháttinn á þann hátt að verið væri að spara tíma og auka hagræði. Benti Ögmundur á að þetta gæti átt við alla landsmenn. Spurði hann hvaða skilaboð fælust í þessu varðandi umhverfismál og efnahagsmál, nú þegar erfiðleikar væru í efnahagsmálum og verðbólga ekki hærri í hálfan annan áratug. Spurði hann hvort þetta væri nýr ferðamáti ráðherra.

Geir H. Haarde forsætisráðherra sagði þau skilaboð send með þessu að fara vel með með fjármuni og tíma. Það væri algjör fjarstæða að tala um pukur. Benti hann á að fjölmiðlum hefði verið boðið með í ferðina í síðustu viku.

Þá sagði hann að hann og Björgvin væru á leið til Norður-Svíþjóðar en þangað væru ekki greiðar almannasamgöngur. Spurningin væri um að eyða í þetta tveimur dögum eða fjórum. Sagðist Geir hafa setið í ríkisstjórn í tíu ár og enn lengur á þingi og sárasjaldan hefði hann séð sig knúinn til þess að nýta þennan flutningsmáta. Sagði hann það dæmalausa lágkúru hjá Vinstri - grænum að draga málin fram eins og flokkurinn hefði gert að undanförnu.

Gaggar eins og hæna úr sæti

Ögmundur svaraði því til að nú vissu menn hver skilaboðin væru. Það væru skilaboðin um húsbændur og hjú. Íslendingar gætu staðið frammi fyrir erfiðleikum í efnahagsmálum og þá þyrfti að skapa samstöðu. Það þyrfti að gera með stjórnarathöfnum og breytni. Ríkisstjórnin legði ekki áherslu á það sem sameinaði og sýndi ráðdeild heldur veldi það sem helst væri táknrænt um misskiptingu í samfélaginu.

Forsætisráðherra benti á að Ögmundur færi enn með frasann um húsbændur og hjú. Þetta snerist auðvitað um að fara vel með opinbert fé. Ráðherrar þyrftu að leggja á sig ferðalög annað slagið. Kom svo til orðaskipta milli Geirs og Ögmundar sem sat úti í sal og lauk þeim með því að Geir sakaði Ögmund um að gagga eins og hæna úr sæti sínu.