Þeyta lúðra þegar pylsurnar eru tilbúnar

Vörubílstjórar sem meðal annars hafa mótmælt háu olíverði undanfarið ætla að grilla fyrir almenning í dag við Fífuna í Kópavogi.

Að þeirra sögn er þetta gert til þess að þakka almenningi fyrir þann stuðning sem þeir segjast hafa fengið frá almenningi.

Kveikt verður upp í grillunum klukkan hálf eitt. Þegar pyslurnar eru tilbúnar ætla bílstjórarnir að þeyta lúðrana á trukkum sínum. Ís og sælgæti verður í boði fyrir börnin og bjóða bílstjórarnir alla velkomna.

Þótt gleðin verði við völd í dag hjá bílstjórunum er það svo aftur harkan sex á morgun en þá munu mótmæli þeirra gegn háu eldsneytisverði halda áfram.