Vonast til fá að vera áfram í HÍ

Hannes Hólmsteinn Gissurarson var í hádegisviðtali Markaðarins fyrir stundu. Þar ræddi hann efnahagsmál við Sindra Sindrason en kom einnig inn á stöðu sína í Háskólanum og nýfallinn dóm Hæstaréttar.

Hannes var m.a spurður hvort Ísland ætti ekki að ganga í Evrópusambandið og taka upp evru. Hannes svaraði því til að við ættum ekki að ganga þar inn heldur að halda áfram á sömu braut en hafa góð tengsl við Evrópusambandið. Hann vill sjá Ísland verða að sjálfsæðri fjármálamiðstöð líkt og Mónakó og benti á að þrjár ríkustu þjóðir Evrópu væru Noregur, Sviss og Ísland.

„Og hvað eiga þessar þjóðir sameiginlegt? Jú, þær standa allar utan Evrópusambandsins."

Hannes var síðan spurður hvort hann yrði áfram prófessor við Háskóla Íslands í kjölfar nýfallins dóms Hæstaréttar.

„Ég tel mig mjög heppinn mann að hafa fengið starf uppi í Háskóla og finnst skemmtilegt þar enda er þetta frábær vinnustaður. Samstarf mitt við starfssystkin mín í félagsvísindadeild er með ágætum og ég vona að þeir vilji njóta minna starfskrafta í framtíðinni eins og þeir hafa gert fram að þessu."