Vill stofna átakshóp um bætta umgengni í borginni

Málefni miðborgarinnar voru áberandi á borgarstjórnarfundi í dag. Þar kynnti borgarstjóri tillögu um stofnun átakshóps um bætta umgengni í borginni. Borgarfulltrúi Framsóknarflokksins bendir hins vegar á að borgarstjóri sé einangraður í miðborgarmálum þar sem hann vilji ekki gefa upp hvort borgin sé hætt að kaupa hús við Laugaveginn.

Eins fram hefur komið í fréttum hefur verið megn óánægja meðal íbúa, verslunareigenda og ferðaþjónustunnar með ástandið í miðbænum. Málið var rætt á borgarstjórnarfundi í dag og eftir því sem segir í tilkynningu frá borgarstjóra kynnti hann tillögu sem hann hyggst leggja fyrir borgarráðsfund um að stofna átakshóp um bætta umgengni í borginni. Þar segir einnig að aðgerða sé þörf og því þurfi að taka til hendinni svo fljótt sem auðið er.

Samkvæmt tillögu borgarstjóra verða verða meðal annars embættismenn borgarinnar, lögreglan, fulltrúar íbúasamtaka, verslunar, veitingahúsa og annarra hagsmunaaðila í átakshópnum. Ráðgert er að hópurinn hittist ört og viðhafi skjót vinnubrögð til að bæta umhirðu í miðborginni, fjarlægja rusl og hreinsa veggjakrot.

,,Þegar hefur verið farið yfir málið með byggingarfulltrúa og slökkviliðsstjóra Reykjavíkurborgar sem munu leggja tillögur fyrir borgarráð n.k.fimmtudag sem miða að því að herða eftirlit og viðurlög gagnvart þeim húseigendum sem hafa látið undir höfuð leggjast að halda húsnæði sínu í því ástandi sem lög og reglur kveða á um. Sviðsstjóra framkvæmda- og eignasviðs Reykjavíkurborgar hefur verið falið að auka verulega vinnu við umhirðu og útlit í miðborginni," segir í tilkynningunni.

Segir borgarstjóra ekki vilja svara hvort uppkaupum sé hætt

Óskar Bergsson, borgarfulltrúi Framsóknarflokksins, sendi frá sér yfirlýsingu í kvöld þar sem hann segir að í umræðum í borgarstjórn í dag um stöðu miðborgarinnar hafi allir borgarfulltrúar verið sammála því að standa vörð um deilskipulag Laugavegar og Þróunaráætlun miðborgarinnar nema borgarstjóri. Hann telji að þær tillögur gangi ekki nóg og langt í húsafriðun.

,,Aðspurður um hvort hann væri hættur að kaupa hús við Laugaveginn, svaraði hann engu. Hanna Birna Kristjánsdóttir, formaður skipulagsráðs staðfesti hinsvegar afstöðu sína um að ekki stæði til að kaupa fleiri hús við Laugaveg. Óvissa ríkir því enn um uppbyggingaráætlun miðborgarinnar , nema Sjálfstæðisflokkurinn taki höndum saman með minnihlutanum um að aflétta óvissunni og hefja uppbygginguna," segir Óskar.