Vaxandi eftirspurn eftir silungsveiðileyfum

Vaxandi eftirspurn er eftir silungsveiðileyfum sem eru allt að tífalt ódýrari en laxveiðileyfi. Veiðitímabilið hófst í morgun á öllum hefðbundnum veiðisvæðum.

Undantekning er þó Varmá í Ölfusi. Þar er enn verið að meta afleiðingar mengunarslyssins í fyrra þegar klór frá sundlauginni í Hveragerði barst út í ána og drap þar fisk í stórum stíl. Vísast hefur annað lífríki líka skaðast.

Til skýringar skal þess getið að sjóbirtingur og urriði eru í raun það sama nema sá hluti stofnsins sem gengur tímabundið til sjávar nefnist sjóbirtingur en urriði heldur sig alltar í ám og vötnum. Sami munur er á bleikju og sjóbleikju en allar þessar tegundir heita einu nafni silungur.

Heldur færri urriðum er nú landað ár eftir ár en áður og bleikju hefur fækkað mikið síðastliðin fimm ár án þess að vísindalegar skýringar séu á því. En allt að einu þá fagna margir veiðimenn því að geta loks dýft öngli fyrir fisk og fjöldi fiska skiptir ekki öllu máli þar sem menn stunda veiðarnar ekki í ábataskyni.

Leyfi á þessar veiðar eru frá þremur þúsundum upp í tíu þúsund fyrir stöng á dag og er aðstaða í veiðihúsi innifalinn í dýrustu leyfunum. Það er því himinn og hafa á milli veiðileyfa á silung og lax því laxveiðileyfi kosta allt upp í 150 þúsund krónur á stöng á dag með fæði og húsnæði.