Nýir flugrekendur fá aðstöðu í jaðri lóðar undir samgöngumiðstöð

Reykjavíkurborg hyggst heimila að jaðar þeirrar lóðar sem ætluð er undir samgöngumiðstöð í Vatnsmýrinni geti nýst þeim sem ekki hafa aðstöðu á flugvellinum enda verði sú starfsemi síðar hluti af samöngumiðstöð. Þetta kemur fram í minnisblaði sem lagt var fram á fundi Ólafs F. Magnússonar borgarstjóra og Kristjáns L. Möller samgönguráðherra í Ráðhúsi Reykjavíkur í dag.

Fram hefur komið að borgin og samgönguyfirvöld hafi samið um samgöngumiðstöð og samkvæmt minnisblaðinu á hún að hýsa alla samgöngustarfsemi í Vatnsmýrinni. Þannig verður hún mistöð flugstarfsemi, almenningssamgangna, hópferðabíla, leigubíla og fleiri.

Borgin leggur áherslu á að öll uppbyging og starfsemi vegna flugrekstrar í Vatnsmýri fari fram í fyrirhugaðri samgöngumiðstöð og sameinist þar á einu svæði í stað þess að dreifast víða um mýrina.

Þá segir í minnisblaðinu að til þess að uppbygging samgöngumiðstöðvarinnar geti hafist þurfi að ganga frá samkomulagi milli borgar og ríkis vegna lóðar undir samgöngumiðstöðina.

Lóðin sem afmörkuð hefur verið er sjö hektarar og sú stærð miðast við flugrekstrarstarfsemi. Flytjist hins vegar flugrekstrarstarfsemin úr Vatnsmýri er gert ráð fyrir því að lóðin minnki um þrjá hektara vegna flughlaða og aukabílastæða. Leggur borgin áherslu á að samið verði um makaskipti á landi milli ríkis og sveitarfélaga vegna þessa.

Eins og fram kom í fréttum fyrr í dag er gert ráð fyrir að fyrsti áfangi samgöngumiðstöðvar verði tilbúinn í lok árs 2009. Fram að þeim tíma mun borgin heimila að jaðar lóðarinnar undir samgöngumiðstöð, sem standa mun norðan við Hótel Loftleiðir, geti nýst þeim flugrekendum sem ekki hafa aðstöðu á vellinum. Fram hefur komið að Iceland Express hafi áhuga á að hefja innanlandsflug en strandað hefur á aðstöðu fyrir félagið.