Blóðbankann þyrstir eftir páskafrí

Blóðbankinn óskar nú eftir gjöfulum Íslendingum til að láta blóð sitt af hendi eftir páskafríið en löng frí segja strax til sín í blóðbúskap þjóðarinnar. „Við finnum strax fyrir því þegar margir frídagar koma í röð og svo urðu auðvitað slys um páskana sem tóku sinn toll," segir Sigríður Ósk Lárusdóttir, deildarstjóri hjá Blóðbankanum. Hún segir alltaf mest vanta af blóði í flokkunum O og A og bankinn þurfi að meðaltali 70 blóðgjafa á dag til að flæðið sé eðlilegt. Yfirleitt gangi þetta bara þokkalega en álagið aukist þegar flensur ganga og í kringum frídaga.

„Við erum sem betur fer sjálfbær þannig að við þurfum ekki blóð erlendis frá enda er blóðskortur alls staðar í heiminum og allir eiga nóg með sitt," segir Sigríður enn fremur. Hún segir Blóðbankann ekki fá neitt fé til að auglýsa svo mikið sé stuðst við tilkynningar í fjölmiðlum og aðstoð deilda Rauða krossins úti á landi þegar söfnunarbíll bankans er á ferðinni en hann fer um allt suðvesturhorn landsins auk Vesturlands og Norðurlands. Á morgun verður bíllinn á ferð við Sundagarða og á Akranesi á miðvikudag.