Sigurður hættir sem ríkisendurskoðandi eftir 16 ára starf

Sigurður Þórðarson ríkisendurskoðandi hefur með bréfi til forseta Alþingis óskað eftir því að láta af störfum frá og með 1. júlí næstkomandi. Þetta kemur fram í tilkynningu til fjölmiðla.

Sigurður var fyrst ráðinn ríkisendurskoðandi 1. júlí 1992 og hefur því gegnt embættinu í 16 ár þegar hann lætur af störfum. Sigurður var áður vararíkisendurskoðandi eða allt frá árinu 1987 þegar Ríkisendurskoðun var færð undir Alþingi. Samkvæmt lögum um Ríkisendurskoðun mun forsætisnefnd Alþingis ráða nýjan ríkisendurskoðanda til sex ára. Ríkisendurskoðandi skal vera löggiltur endurskoðandi.