Harðar deilur um stúku á borgarráðsfundi í gær

Upp úr sauð á borgarráðsfundi í gær þegar greinargerð formanns KSÍ um framkvæmdir við Laugardalsvöll var lögð fram. Skiptar skoðair voru um það hver ber ábyrgðina á því að kostnaðun við framkvæmdirnar fóru fram úr áætlun.

Allt útlit er fyrir að kostnaðaraukning Reykjavíkurborgar vegna framkvæmda við Laugardalsvöll verði tæpar 200 milljónir króna. Formaður KSÍ heldur því fram í greinargerð sinni að Degi B. Eggertssyni, borgarfulltrúa Samfylkingarinnar og fyrrverandi nefndarmanni í bygginganefnd, hefði átt að vera fullljóst að framkvæmdirnar færu fram úr áætlun strax í apríl 2006.

Á borgarráðsfundinum í gær hafnaði Dagur því alfarið og sagði greinargerðina stangast í mikilvægum atriðum á við fyrirliggjandi gögn málsins, fundargerðir bygginganefndar og fyrri yfirlýsingar formanns KSÍ.

Upp úr sauð þegar sjálfstæðismenn létu þá færa til bókar að Dagur hefði sem nefndarmaður í byggingarnefnd átt að mótmæla ákvörðunum KSÍ sem leiddu til þess að samningar við verktaka voru hærri en áætlað var og að hann hefði átt að óska eftir frekari fundum í nefndinni. Ábyrgðin væri því í raun hans og R-listans sem þá fór með völd í borginni.

Þetta þótti minnihlutanum í Reykjavík með ólíkindum og sagði það vekja upp spurningar um hvaða hagsmuni meirihlutinn hefði að leiðarljósi í þessu máli.

Borgarráð komst ekki að niðurstöðu á fundinum um hvernig greiðslum til KSÍ skyldi háttað vegna framkvæmdanna. Nokkrar tillögur þar að lútandi voru lagðar fyrir fundinn en þær voru ekki teknar til efnislegrar meðferðar.