Illinois morðinginn var afburðanemandi

Maðurinn sem hóf skothríð í Northern Illinois háskólanum í Bandaríkjunum í gærkvöld með þeim afleiðingum að fimm féllu hét Stephen Kazmierczak. Hann var 27 ára gamall og stundaði framhaldsnám í félagsfræði við skólann. Hann var vopnaður þremur skammbyssum og haglabyssu.

Don Grady lögreglumaður í Illinois segir að ekki sé vitað hvers vegna Kazmierczak hóf skotárásina í fyrirlestrasal í skólanum þar sem vel á annað hundrað manns hlýddu á fyrirlestur. Auk þeirra sem dóu særðust 15 manns áður en Kazmierczak skaut sjálfan sig til bana.

BBC fréttastöðin hefur eftir lögreglunni í Illinois að Kazmierczak hafi verið framúrskarandi nemandi, sem hefði hlotið verðlaun fyrir námsárangur. Ekkert hefði bent til þess að hann væri líklegur til að fremja ódæðisverk eins og þetta. Hann hafi þó verið svolítið sljór undanfarna daga, eftir að hann hætti að taka lyfin sín. Ekki er vitað hvaða lyf hann tók eða við hverju hann tók þau.

Robert Kazmierczak, faðir byssumannsins, var harmi sleginn þegar fjölmiðlar heimsóttu hann að heimili hans í Lakeland í Flórída í dag. Hann sagði að þetta væri erfiður tími en gat að öðru leyti ekki tjáð sig.

Fjölmargir hafa vottað aðstandendum hinna látnu virðingu sína og samúð. Þeirra á meðal er George Bush Bandarikjaforseti.