Útspil ríkisstjórnarinnar hugsanlega klárt um helgina

Geir H. Haarde forsætisráðherra segir að útspil ríkisstjórnarinnar í tengslum við kjarsamninga á almennum vinnumarkaði líti dagsins ljós í fyrsta lagi um helgina en gæti allt eins dregist fram yfir helgi.

Þetta kom fram í máli hans eftir fund ríkisstjórnarinnar með forsvarsmönnum verkalýðshreyfingarinnar og Samtaka atvinnulífsins í Ráðherrabústaðnum við Tjarnargötu í dag. Þar viðruðu aðilar vinnumarkaðarins sínar hugmyndir um aðkomu ríkisstjórnarinnar að málum.

Ríkisstjórnin fundaði fyrst með ASÍ og sagði Grétar Þorsteinsson, forseti sambandsins, eftir fundinn að ASÍ hefði ekki fengið nein ákveðin svör frá ríkisstjórinni um hennar aðkomu að samningum. Hins vegar yrði farið í praktíska vinnu við að fara yfir tillögur ASÍ í þessum efnum.

Vilhjálmur Egilsson, framkvæmdastjóri Samtaka atvinnulífsins, sagði í samtali við Vísi eftir fundinn með ríkisstjórninni að samtökin hafi farið yfir þau atriði sem þau hefðu lagt upp við ríkisstjórnina áður. Þau sneru að starfsskilyrðum atvinnulífsins og aðgerðum til þess að ná niður verðbólgu. „Seðlabankinn hefur skellt skollaeyrum við öllu sem heyrist og sést í samfélaginu og ríkisstjórnin þarf að grípa í taumana," sagði Vilhjálmur og vísaði til þess að milli ríkisstjórnarinnar og Seðlabankans sé í gildi samkomulag um verðbólgumarkmið bankans. Vilhjálmur telur að endurskoða þurfi það samkomulag.

Varðandi framvindu kjarasamninga sagði Vilhjálmur að hann reiknaði með að ASÍ og SA myndu klára efnisatriði í samningum í kvöld. Þá væri skjalafrágangur eftir en óvíst væri hvað hann tæki langan tíma. Það myndi þó að líkindum klárast um helgina og því ljóst að ríkisstjórnin hefði ekki langan tíma. Fram kom í máli forseta ASÍ fyrr í dag að ekki yrði skrifað undir samninga fyrr en útspil ríkisstjórnarinnar í tengslum við kjarasamninga lægi fyrir.