Varar við því að hindra aðgang fjölmiðla

„Til að tryggja opið og lýðræðislegt samfélag þarf að greiða leið allra fjölmiðla að fréttaviðburðum. Blaðamannafélagið varar við tilraunum til þess að standa í vegi fyrir því. Vinnubrögð af því tagi sem viðhöfð voru í vikunni eru auk þess einungis til þess fallin að skapa tortryggni," segir í bréfi sem stjórn blaðamannafélagsins sendi Andra Óttarssyni, framkvæmdastjóra Sjálfstæðisflokksins, í dag.

Tilefnið er blaðamannafundur Vilhjálms Þ. Vilhjálmssonar í Valhöll á mánudag, þegar blaðamönnum og ljósmyndurum var meinaður aðgangur að Vilhjálmi á meðan hann ræddi við fréttamenn ljósvakamiðla um stöðu sína í borginni, en sent var beint út frá fundinum á Vísi, mbl.is og hjá Sjónvarpinu.

Bréfið er hér í heild sinni.

„Til: Framkvæmdastjóra Sjálfstæðisflokksins

Frá: Stjórn Blaðamannafélags Íslands

Efni: Blaðamannafundur í Valhöll

Blaðamannafélag Íslands harmar framgöngu starfsmanna Sjálfstæðisflokksins vegna blaðamannafundar í Valhöll í vikunni. Hópi fjölmiðlamanna var meinaður aðgangur að fundi í beinni útsendingu með kjörnum fulltrúa borgarinnar um málefni sem brennur á almenningi. Til að tryggja opið og lýðræðislegt samfélag þarf að greiða leið allra fjölmiðla að fréttaviðburðum. Blaðamannafélagið varar við tilraunum til þess að standa í vegi fyrir því. Vinnubrögð af því tagi sem viðhöfð voru í vikunni eru auk þess einungis til þess fallin að skapa tortryggni. BÍ fer fram á að þau endurtaki sig ekki. Í lýðræðislegu samfélagi verða fjölmiðlar að hafa frelsi til að sinna skyldum sínum," segir í bréfinu sem Arna Schram, formaður BÍ ritar undir.