Geðhjálp íhugar að kljúfa sig úr ÖBÍ

Ágreiningur er innan Öryrkjabandalagsins um stefnu þess segir framkvæmdastjóri Geðhjálpar og vísar til óánægjuradda innan bandalagsins. Aukaaðalfundur verður hjá bandalaginu í dag þar sem kjósa á nýjan formann í stað Sigursteins Mássonar, fulltrúa Geðhjálpar í stjórninni, sem hætti í janúar vegna deilna um skipan í stjórn Brynju, hússjóðs Öryrkjabandalagsins.

Tillaga meirihluta framkvæmdastjórnar Örykjabandalagsins að skipan í hússjóðinn var felld á fundi í síðasta mánuði og varð það til þess að Sigursteinn sagði af sér sem formaður. Hann taldi ljóst að ekki væri lengur trúnaður á milli hans og nýrrar stjórnar í hússjóði Öryrkjabandalagsins.

Í kjölfar þessa óskaði Geðhjálp að fram færi aukaaðalfundur og verður hann haldinn í dag klukkan fimm. Þar á að kjósa nýjan formann og hefur þegar eitt framboð borist, frá Halldóri Sævari Guðbergssyni, formanni Blindrafélagsins. Menn geta þó boði sig fram á fundinum þannig að ekki er ljóst hvort fleiri verða í framboði.

Sveinn Magnússon, framkvæmdastjóri Geðhjálpar, viðurkennir að ágreiningur sé innan Örykjabandalagsins um stefnu þess. „Það eru mjög miklar óánægjuraddir innan dyra og frá okkar bæjardyrum séð getur það ekki staðið að aðildarfélag sé í rekstri og bjóði þjónustu um leið og það er hagsmunagæslufélag," segir Sveinn og vísar þar til hlutverks Öryrkjabandalagsins og rekstur þess á íbúðum.

„Það vantar gjörsamlega viðhorfsbreytingu í þessu og að félögin innan bandalagsins fari að vinna að hagsmunatengslum og láti lögbæra aðila um að sinna búsetu og stoðþjónustu," segir Sveinn. Þessi krafa verði enn háværari þegar hússjóðurinn hafi verið staðinn að vanefndum á búsetuþjónustu sinni.

Aðspurður hvort Geðhjálp íhugi að kljúfa sig frá Öryrkjabandalaginu segir Sveinn að hlutirnir þurfi að lagast til að samstarf haldi áfram. „Það stendur ekki til að segja sig úr bandalaginu á þessum fundi því svoleiðis hugmynd þyrfti fyrst að fá umfjöllun hjá stjórn Geðhjálpar og á aðalfundi þess félags," segir Sveinn.