Kjálka- og kinnbeinsbrotinn eftir fólskulega árás í Reykjanesbæ

Nítján ára karlmaður var fluttur á slysadeild Landspítalans kjálka- og kinnbeinsbrotinn eftir fólskulega árás á hann og föður hans að Heiðarhvammi í Reykjanesbæ laust upp úr klukkan sjö í gærkvöldi.

Tveir menn með hulin andlit réðust á feðgana og beitti annar þeirra barefli, sem hann lét dynja á syninum, en faðirinn náði að verja sig og slapp nær ómeiddur.

Árásarmennirnir eru taldir 180 til 190 sentímetrar á hæð. Þolendurnir segjast ekki hafa borið kennsl á þá og ekki vita hvað þeim gekk til. Lögreglan í Reykjanesbæ lýsir eftir vitnum eða öðrum upplýsingum sem leitt gætu til þess að upplýsa þessa fólskulegu árás.