Ölvaður í Elliðaánum

Ölvaður ökumaður, sem ók austur Bústaðaveg í gærkvöldi, gleymdi að beygja til hægri eða vinstri á mótum Reykjanesbrautar heldur ók þvert yfir hana og út í eina kvísl Elliðaánna.

Honum tókst að komast út úr bílnum af eigin rammleik og tók til fótanna, rennblautur og eitthvað meiddur. Lögreglumenn höfðu uppi á honum skömmu síðar á Sogavegi og fluttu hann á slysadeild til aðhlynningar, þar sem hann dvaldi í nokkrar klukkustundir.

Þaðan var hann svo fluttur í fangageymslur. Kranabíll hífði bílinn upp úr ánni.