Ráðherra á minkaskinnsuppboði í Danmörku

Einar Kristinn Guðfinnsson, sjávarútvegs- og landbúnaðarráðherra, og Sigurgeir Þorgeirsson ráðuneytisstjóri voru í vikunni viðstaddir uppboð á minkaskinnum hjá uppboðshúsinu Kopenhagen Fur í Danmörku.

Fram kemur í tilkynningu frá sjávarútvegs- og landbúnaðarráðuneytinu að margar gerðir skinna hafi verið til sölu, meðal annars karakul lambaskinn, marðarskinn, refaskinn og minkaskinn sem er langstærsti hlutinn.

Að þessu sinni voru 3,4 milljónir minkaskinna boðnar upp, þar af tæplega tíu þúsund íslensk. Þá kemur fram í tilkynningunni að mjög gott verð hafi fengist fyrir skinnin, eða um 3400 krónur fyrir skinnið að meðaltali sem sé um þrjátíu prósentum hærra verð en á síðasta uppboði Kopenhagen Fur sem haldið var í desember.

Ráðherra átti fund með Torben Nielsen, framkvæmdastjóra uppboðshússins, og þar kom fram að sú mikla aukning sem sögð hefur verið á skinnaframleiðslu Kínverja er orðum aukin. „Því er minni ástæða til að óttast þá miklu samkeppni sem talin var yfirvofandi. Það, ásamt þessari góðu sölu núna, eykur mönnum bjartsýni á framtíðina enda mátti glöggt merkja að brúnin léttist á mörgum loðdýraræktandanum á uppboðinu," segir í tilkynningunni.