Innlent

Samhæfingarmiðstöðin virkjuð um miðjan dag vegna vonskuveðurs

Samhæfingarmiðstöðin í Skógarhlíð verður virkjuð klukkan fjögur í dag vegna vonskuveðurs sem gengur yfir landið síðdegis og fram á nótt. Fram kemur í tilkynningu frá Slysavarnafélaginu Landsbjörgu að björgunarsveitir verði í viðbragðsstöðu sem og lögregla og slökkvilið. Eiga allar óskir um aðstoð að berast Neyðarlínunni í síma 112

Í tilkynningu Landsbjargar segir einnig að gert sé ráð fyrir talsverðu vatnsveðri og snörpum vindhviðum, fyrst suðaustanátt sem snýst í suðvestanátt en þessar áttir valda oft vandræðum á höfuðborgarsvæðinu og þá sérstaklega í efri byggðum. Einnig má búast við miklum vindhviðum á Kjalarnesi, undir Hafnarfjalli og í Vallarhverfinu í Hafnarfirði.

Húseigendum um land allt er bent á að hreinsa vel frá niðurföllum og huga að lausum munum. Verktakar eru sérstaklega áminntir að ganga vel frá sínum vinnusvæðum.

Þá verður stórstreymt og eigendur báta eru beðnir að huga að þeim. Enn fremur biður Landsbjörg þá sem þurfa að vera á ferðinni að fylgjast með þróun veðursins og færð á vegum.

Mest lesið


Fleiri fréttir

Sjá meira


×

Mest lesið