Ekki menntamálaráðherra sem semur við kennara

Ekki er hægt að líta svo á að Þorgerður Katrín Gunnarsdóttir menntamálaráðherra hafi talað fyrir sjónarmiðum ríkisstjórnarinnar þegar hún lýsti því yfir að hækka þyrfti verulega laun kennara á fundi á dögunum. Þetta sagði Árni M. Mathiesen fjármálaráðherra á þingi í dag og vísaði til þess að fjármálaráðherra færi með samninga við opinbera starfsmenn.

Með þessu var hann að svara óundirbúinni fyrirspurn Steingríms J. Sigfússonar, formanns Vinstri - grænna. Hann vísaði til orða sem Þorgerður Katrín lét falla á fundi með sjálfstæðismönnum í Vahöll á dögunum. Þar sagði Þorgerður að kennarar hefðu dregist aftur úr í launum og ef menn vildu fá gott fólk í skólana þyrfti að hækka laun kennara og styrkja menntun þeirra.

Spurði Steingrímur hvort ekki væri ljóst að þarna væri talað fyrir hönd ríkisstjórnarinnar. Sagðist hann fagna orðum menntamálaráðherra og kennarar þyrftu að fá myndarlegar launahækkanir.

Árni M. Mathiesen sagði samninga ríkisins við starfsmenn sína vandmeðfarinn málaflokk. Það hefði verið stefna ríkisstjórnarinnar að láta almenna markaðinn vera leiðandi varðandi launaþróun. Það þýddi þó ekki að jafnt ætti yfir alla að ganga því stundum væri það svo að einn hópur þyrfti að fá launaleiðréttingu umfram annan. Vísaði hann til þess að á vegum ríkisstjórnarinnar væri nú unnið að því að hækka laun svokallaðra kvennastétta.

Enn fremur sagði Árni að ekki væri hægt að líta svo á að sjónarmið menntamálaráðherra væri sjónarmið ríkisstjórnarinnar. Það væri hlutverk fjármálaráðherra að semja við opinbera starfsmenn og það yrði gert á næstu mánuðum.

Sagði svar ráðherra loðið

Steingrímur sagði svar ráðherra loðið að því undanskildu að fjármálaráðherra hefði svarið af sér menntamálaráðherra. Sagði hann enn fremur að ríkisstjórnin væri búin að hleypa málum í uppnám a almennum vinnumarkaði en gæti enn gert eitthvað í málum opinberra starfsmanna.

Fjármálaráðherra sagði ekki skrýtið að svör hans væru loðin í ljósi þess að hann væri á leið í samningaviðræður. Það væri engin leið að segja úr ræðustóli Alþingis hvernig samningar ættu að vera. Benti hann aftur á að það væri ekki menntamálaráðherra sem færi með samninga við opinbera starfsmenn heldur fjármálaráðherra. Hvað sem liði góðum hug yrði að gæta að því hvernig staðið yrði að samningum.