Annríki hjá lögreglu og björgunarsveitum

Mikið annríki er nú hjá björgunarsveitum og lögreglu víða á landinu. Á Hellisheiði sitja bílar fastir en björgunarsveitir eru á leiðinni til hjálpar fólki. Bílar sem þar sitja fastir verða skildir eftir.

Á Suðurnesjum hefur færðin verið mjög erfið eins og annars staðar. Lögreglan þar segir að mest mæði á Reykjanesbrautinni en búið sé að greiða úr umferðarteppu sem hafi komið upp við Vogaafleggjarann. Lögreglan á Suðurnesjum segir að ef veðrið muni versna þá megi allt eins búast við að Reykjanesbraut verði lokað um óákveðinn tíma.

Jón Ingi Sigvaldason hjá Slysavarnafélaginu Landsbjörgu segir að björgunarsveitamenn hafi einnig verið að störfum við Hafnarfjall og víðar í nágrenni við höfuðborgina. Þá segir hann að sveitir úr Reykjavík hafi farið til aðstoðar á Hellisheiði þar sem sé mikil ófærð og fjöldi bíla fastir. Jón Ingi varar fólk við að vera á illa búnum bílum, hvort sem er í höfuðborginni eða utan hennar.