Byggingarstofnun í stað Brunamálastofnunar

Byggingarstofnun mun taka við hlutverki Brunamálastofnunar og hlutverk slökkviliðs verður betur skilgreint í lögum samkvæmt frumvarpi um breytingar á lögum um brunavarnir sem Þórunn Sveinbjarnardóttir umhverfisráðherra hefur lagt fram á Alþingi.

Frumvarpið snýr annars vegar að breytingum á löggjöf um byggingarmálefni og hins vegar breytingar á lögum um brunavarnir. Sem fyrr segir á ný stofnun, Byggingarstofnun, að taka við hlutverki sem Brunamálastofnun hefur sinnt auk þess sem stofnunin á að hafa ábyrgð framkvæmd byggingarmála sem hingað til hefur verið í höndum Skipulagsstofnunar.

Gert er ráð fyrir að undir Byggingarstofnun heyri öll mál er varða öryggi bygginga, þ.m.t. brunavarnir, rafmagnsöryggi og eftirlit með lyftum, en þessir þættir hafa hingað til heyrt undir hinar ýmsu stofnanir og ráðuneyti. Með þessu á að einfalda allt eftirlit með öryggi mannvirkja. Lagt er til að lög um brunavarnir haldi gildi sínu sem sjálfstæð lög og að mestu óbreytt enda hafi þau í aðalatriðum reynst vel frá því að þau voru sett árið 2000.

Í frumvarpinu er þessu til viðbótar lagt til að björgun á fastklemmdu fólki úr mannvirkjum og farartækjum verði eitt af lögbundnum verkefnum slökkviliða. Í meira en áratug hafa langflest slökkvilið landsins sinnt þessu verkefni án lagaskyldu.

„Björgun fólks úr farartækjum, t.d. eftir umferðarslys, krefst sérhæfðs búnaðar og þjálfunar þeirra sem búnaðinn nota. Þegar beita þarf slíkum tækjum er nauðsynlegt að slökkvilið sé á staðnum vegna eldhættu við farartækið. Hefur því skapast sú hefð að slökkvilið sinni þessu verkefni og er kennsla í meðferð búnaðarins hluti af námsefni Brunamálaskólans. Búnaðurinn nýtist einnig við björgun fólks úr mannvirkjum. Með því að gera verkefnið lögbundið er tryggt að þessi þjónusta sé fyrir hendi á öllu landinu og hún uppfylli tilteknar lágmarkskröfur. Þannig verður unnt að setja reglur um lágmarksbúnað, þjálfun starfsmanna, forvarnir og viðbragðsáætlanir," segir í greinargerð með frumvarpinu.