Virkjanir í neðri hluta Þjórsár hafa forgang á Búðarhálsvirkjun

Þrjár virkjanir í neðri hluta Þjórsár eru enn í forgangi hjá Landsvirkjun þrátt fyrir að fyrirtækið hafi tekið aftur til skoðunar áform um byggingu Búðarhálsvirkjunar.

Fram kemur í tilkynningu á vef Landsvirkjunar að Landsvirkjun hafi átt í viðræðum við fjölmarga áhugasama orkukaupendur úr virkjunum á Suðurlandi til notkunar í hátækniiðnaði af ýmsu tagi. Segir fyrirtækið ljóst að eftirspurn eftir raforku sé mun meiri en sem nemur orkugetu þeirra þriggja virkjana í neðri hluta Þjórsár sem nú eru í undirbúningi, þ.e. Hvamms-, Holta- og Urriðafossvirkjun.

Því hafi Landsvirkjun tekið aftur til skoðunar Búðarhálsvirkjun en áform um hana voru lögð til hliðar á sínum tíma þar sem hún þótti ekki nægilega hagkvæm. Þar sem mögulegir orkukaupendur nú séu líklegir til að greiða hærra verð en áður megi reikna með að sala á raforku frá Búðarhálsvirkjun geti nú orðið ábatasöm.

Þar segir einnig að hönnun Búðarhálsvirkjunar geti tekið breytingum sem leiði til aukinnar hagkvæmni ef virkjun og/eða miðlanir yrðu byggðar ofar á vatnasviði hennar. Í vinnu við 2. áfanga rammaáætlunar sem nú sé nýhafin á vegum ríkisstjórnarinnar verði slík mannvirki metin í samanburði við aðra virkjunarkosti. „Landsvirkjun telur að öðru jöfnu skynsamlegt að draga ákvörðun um byggingu Búðarhálsvirkjunar þar til að skýrist hverjar niðurstöður í rammaáætlun verða til þess að tryggja sem mesta hagkvæmni virkjunarinnar, nema að þörf verði fyrir orku Búðarhálsvirkjunar áður en þeirri vinnu lýkur og hægt verði að selja hana á verði sem uppfyllir arðsemiskröfur fyrirtækisins," segir enn fremur í tilkynningu Landsvirkjunar.

Búðarhálsvirkjun á að verða 80-90 megavatta virkjun og verður inntakslón hennar, Sporðöldulón, myndað með um 2,3 km langri stíflu yfir Köldukvísl, skammt ofan við ármót Köldukvíslar og Tungnaár rétt neðan við Hrauneyjafossstöð. Stöðvarhús Búðarhálsvirkjunar verður ofan jarðar og grafið inn í hlíð Búðarháls við Sultartangalón. Virkjunin hefur þegar farið í gengum umhverfismat.