Alyson Bailes fær sænska orðu fyrir störf sín

Karl Gústaf Svíakonungur hefur ákveðið að veita Alyson Bailes, sendiherra og gestaprófessor við Háskóla Íslands, viðurkenningu með Stórriddarakrossi hinnar konunglegu sænsku Norðurstjörnuorðu.

Fram kemur í tilkynningu frá sænska sendiráðinu að Bailes sé heimsþekktur fræðimaður á sviði öryggis- og varnarmála. Hún var forstöðumaður Stockholm International Peace Research Institute sem þykir leiðandi á sviði rannsókna um stríð og frið í heiminum.

Hún situr í stjórn Alþjóðamálastofnunar og Rannsóknaseturs um smáríki við Háskóla Íslands. Bailes starfaði enn fremur í bresku utanríkisþjónustunni og varnarmálaráðuneytinu um langa hríð. 

Madeleine Ströje Wilkens, sendiherra Svíþjóðar, afhendir Balies orðuna við hátíðlega athöfn í sænska sendiráðinu í dag klukkan 18.