Lögreglan í átaki: Klippir númer og lætur menn blása

Að sögn lögreglu er töluvert um ótryggð og óskoðuð ökutæki á höfuðborgarsvæðinu en eigendur og umráðamenn þeirra eru hvattir til að gera þar bragarbót á.

„Undanfarið hafa skráningarnúmer verið fjarlægð af allnokkrum ökutækjum sem uppfylltu ekki ákvæði um skoðun eða voru ótryggð," segir í tilkynningu frá lögreglu. Þá segir einnig að eftirlitinu verði haldið áfram næstu daga og hvetur ökumenn til að passa upp á þetta svo ekki þurfi að koma til fyrrnefndra aðgerða.

„Lögreglan heldur sömuleiðis úti reglulega eftirliti með ölvunarakstri en á föstudag mega ökumenn búast við að verða stöðvaðir vegna þessa víðsvegar í umdæminu,"segir einnig í tilkynningunni frá lögreglunni á höfuðborgarsvæðinu.