Staðfesti farbann vegna árása á lögreglumenn

Hæstiréttur hefur staðfest farbannsúrskurð yfir tveimur Litháanna sem eru grunaðir um að hafa ráðist á lögreglumenn við skyldustörf í miðbæ Reykjavíkur þann 11. janúar. Samkvæmt úrskurðinum verða þeir í farbanni til 15. febrúar.

Eins og fram hefur komið í fréttum eru alls fimm Litháar grunaðir um að hafa ráðist að tilefnislausu á fjóra lögreglumenn sem voru við fíkniefnaeftirlit í miðborginni. Þrír mannanna voru handteknir á staðnum en tveir á heimili sínu í Reykjavík.

Fram kemur í gæsluvarðhaldsúrskurðinum að tveir lögreglumannanna hafi verið fluttir með sjúkrabíl á slysadeild, annar meðvitundarlaus með heilahristing og tognun í hálsi eftir höfuðhögg en hinn með ýmsa yfirborðsáverka í andliti. Hinir tveir lögreglumennirnir fóru sjálfir á slysadeild og reyndust með áverka í andliti.