Sakar sjálfstæðismenn um skemmdarverk á Suðurnesjum

Kristinn H. Gunnarsson, þingflokksformaður Frjálslynda flokksins, gagnrýndi sjálfstæðismenn á þingi harðlega fyrir að vilja skilja í sundur lögreglu, tollgæslu og öryggisgæslu á Suðurnesjum og sakaði þá um skemmdarverk.

Það var Grétar Mar Jónsson, flokksbróðir Kristins, sem tók málið upp á Alþingi í dag og sagði Björn Bjarnason dómsmálaráðherra hafa lítilsvirt Alþingi og gefið Árna Mathiesen fjármálaráðherra fyrirmæli um að breyta tollalögum. Breytingarnar sneru aðallega að lögreglunni á Suðurnesjum þar sem ætlunin væri að skilja að tollgæslu og lögreglu sem sameinuð hefðu verið undir einu embætti fyrir aðeins 16 mánuðum.

Sagði hann frjálslynda hafa farið fram á úttekt á lögreglustjóraembættinu á Suðurnesjum og þeir vildu því bíða með allar breytingar þar til sú úttekt lægi fyrir. Spurði hann Arnbjörgu Sveinsdóttur, þingflokksformann Sjálfstæðisflokksins, hvort stuðningur væri við málið í ríkisstjórninni.

Arnbjörg sagði að verið væri að fjalla um málið hjá flokkunum og ágætis samstarf væri hjá Birni Bjarnasyni og Árna Mathiesen. Hún ætti ekki von á öðru en að það kæmu fram góðar tillögur í málinu og menn fengju lausn í því.

Tækifæri til að efla lögregluna

Björk Guðjónsdóttir, flokkssystir Arnbjargar og þingmaður Suðurkjördæmis, sagði sveitarstjórnarmenn hafa lýst yfir áhyggjum af málinu en þeim hefði verið kynnt breytingin í fyrra á þann veg að hún myndi styrkja og efla lögregluna á Suðurnesjum. Síðan hefði lögreglumönnum fækkað og sveitarstjórnarmenn hefðu áhyggjur af öryggi íbúa á Suðurnesjum. Sagði hún breytingarnar ekki eiga að veikja stöðu lögreglu, tolls og öryggisgæslu og með nýju fyrirkomulagi ætti að skapast tækifæri til þess að efla lögregluna.

Eitt alskrítnasta má sem komið hefur inn á Alþingi

Kristinn H. Gunnarsson sagði málið eitt það alskrítnasta sem rekið hefði á fjörur Alþingis. Nýbúið væri að sameina lögreglu á Suðurnesjum og tollgæslu og öryggisgæslu á Keflavíkurflugvelli með því markmið að ná fram hagræðingu. Nú ætti að rífa þetta í sundur með sömu rökum.

Spurði hann Björk hvað hún ætti við með nýjum tækifærum, hvort það væri tækifæri til þess að henda út sparnaði og eyðileggja það samstarf sem náðst hefði. Enn fremur spurði hann hvort þetta væri tækiæri til þess að fá annan sýslumann með annað flokksskírteini. Sagðist hann undrandi að heyra þetta frá þingmanni Suðurkjördæmis. Gerði hann orð Lúðvíks Bergvinssonar, þingflokksformanns Samfylkingarinnar, að sínum og spurði: „Hvers vegna að gera við það sem ekki er bilað?"

Tóm lögreglustöð í Grindavík

Steingrímur J. Sigfússon, formaður Vinstri - grænna, tók í svipaðan streng og sagði að stjórnvöld yrðu að skýra betur hvað lægi á bak við ákvarðanirnar. Þá þyrfti að fá upp á borðið ef um persónulegan ágreining væri að ræða.

Vakti hann enn fremur athygli á því að hin almenna lögggæsla í landinu væri að drabbast niður. Hann hefði nýverið verið í Grindavík og þar væri megn óánægja með það að þar stæði lögreglustöðin tóm. Þetta væri ástandið sem boðið væri upp á í einum af stóru kaupstöðum landsins. Sagði hann meiri fjármuni vanta í málaflokkinn og að nær væri að setja peninga í löggæslu en varnarmál.