Ólíðandi framkoma í Valhöll

Arna Schram, formaður Blaðamannafélags Íslands, segir að sú framkoma sem fjölmiðlar hafi mætt í Valhöll í gær, þar sem Vilhjálmur Þ. Vilhjálmsson ávarpaði fjölmiðla, sé að hennar mati með öllu ólíðandi. Hún býst við að málið verði skoðað á vettvangi Blaðamannafélagsins.

Töluverðrar óánægju hefur gætt meðal blaðamanna með framgöngu starfsmanna Sjálfstæðisflokksins fyrir fundinn í gær. Þá var blaðamönnum og ljósmyndurum meinað aðgangur að Vilhjálmi á meðan hann ræddi við fréttamenn ljósvakamiðla um stöðu sína í borginni, en sent var beint út frá fundinum á Vísi og hjá Sjónvarpinu og Ríkisútvarpinu. Eftir að Vilhjálmur hafði svarað ljósvakamiðlum var blaðamönnum prentmiðla leyft að ræða við Vilhjálm einn í einu.

„Mér finnst þessi framkoma með öllu ólíðandi, að reyna að stjórna fjölmiðlaumfjöllun um málið. Þarna var kjörinn fulltrúi að tala um mál sem varðar almenning og að sjálfsögðu eiga allir miðlar að eiga rétt að ræða við borgarfulltrúann á þessum fundi. Það er ótrúlegt að þetta skuli gerast á 21. öldinni," segir Arna. Aðspurð segist hún í fljótu bragði ekki muna eftir öðru eins atviki.

Málið skoðað á vettvangi Blaðamannafélagsins

Arna var sjálf á staðnum sem blaðamaður Viðskiptablaðsins og mátti hún eins og starfsmenn annarra prentmiðla bíða eftir viðtali við oddvita sjálfstæðismanna. Aðspurð hvaða skýringar blaðamenn hafi fengið á þessum gjörðum segir Arna að þær hafi verið margar. „Meðal annars að þetta væri gert til þess að auðvelda okkur störfin," segir Arna.

„Svo vorum við látin draga um það í hvaða röð blaðamenn fengju að ræða við Vilhjálm og þá einn í einu. Hver blaðamaður fékk um tíu mínútur og þegar við vorum að nálgast þann tíma kom starfsmaður flokksins til þess að sitja yfir okkur," segir Arna og á þar við framkvæmdastjóra borgarastjórnarflokks Sjálfstæðisflokksins.

Aðspurð hvort brugðist verði við þessu á vettvangi Blaðamannafélagsins segir Arna að málið verði að líkindum skoðað en engin ákvörðun hafi verið tekin um viðbrögð á þessari stundu.