Skilorðsbundið fangelsi fyrir að slá mann með hafnaboltakylfu

Héraðsdómur Reykjavíkur dæmdi í dag 18 ára karlmann í fjögurra ára skilorðsbundið fangelsi fyrir sérstaklega hættulega líkamsárás með hafnaboltakylfu.

Maðurinn játaði sök en bar því við að fórnarlambið hefði átt upptökin og slegið hann í framan. Framburður hans þótti hins vegar ekki trúverðugur og var hann því sakfelldur. Segir í dómnum að maðurinn hafi viðurkennt að hafa beinlínis ætlað að slá kæranda í höfuðið og teljist árás hans sérstaklega hættuleg. Hún hafi verið tilefnislaus og ófyrirleitin.

Hins vegar var horft til þess að maðurinn var aðeins 16 ára þegar árásin átti sér stað og þess að afleiðingar árásarinnar urðu ekki alvarlegar. Auk fjögurra mánaða fangelsis, sem skilorðsbundið er til þriggja ára, var maðurinn dæmdur til að greiða fórnarlambi sínu rúmar hundrað þúsund krónur í skaðabætur.

Maðurinn var einnig sviptur ökuleyfi í fjóra mánuði og gert að greiða 140 þúsund króna sekt fyrir að hafa í fyrrasumar ekið eftir Miklubraut á 165 kílómetra hraða þar sem hámarkshraði var 80 kílómetrar.