Johnny Logan: Býst við brjósthöldurum upp á svið

Evróvisjón hjartaknúsarinn Johnny Logan hefur vakið mikla athygli síðan hann kom til landsins. Logan fór í labbitúr eftir Laugarveginum í dag, og hafði ekki undan að taka í hendur og skrifa eiginhandaráritanir.

Daníel Birgisson, sem skipuleggur tónleikana með Logan á Broadway annað kvöld, var á leiðinni með hann í víkingaþorpið í Hafnarfirði þegar vísir náði tali af honum. Hann segir Logan mikinn áhugamann um víkinga. „Hann er náttúrulega Íri og þar er mikil víkingamenning. Við munum sjá þetta annað kvöld þegar víkingaeðlið brýst út á sviðinu."

Það víkingaeðli virðist leggjast vel í kvenþjóðina. „Hann er svo mikill dömumaður, hann fær nærbuxur í hausinn á hverjum einustu tónleikum," segir Daníel „Það má alveg búast við því að það komi tveir eða þrír haldarar upp á svið." Miðað við þá ímynd sem sköpuð hefur verið af íslensku kvenfólki erlendis er réttast að spyrja hvort Logan óttist ekki aðgangshörku þeirra á tónleikunum á morgun. „Ég lifi í voninni," segir Logan og hlær. „Ég bjóst aldrei við því að víkingarnir yrðu mjúkhentir."