Hallargarðurinn verði áfram fyrir almenning

Ólafur F. Magnússon borgarstjóri segist hafa verið á móti sölu á Fríkirkjuvegi 11 þegar hún var ákveðin upphaflega. Hann telur þó of seint að snúa frá sölunni núna.

Þorleifur Gunnlaugsson, borgarfulltrúi Vinstri grænna, lagði í dag fram tillögu þess efnis að borgarráð samþykki að leita leiða til að afturkalla sölu á fasteigninni Fríkirkjuvegi 11 þar sem komið hefði í ljós að nýr eigandi ætti erfitt með að nýta eignina án verulegra breytinga á Hallargarðinum.

„Aðalatriðið er að Hallargarðurinn verði áfram fyrir almenning og ég mun standa vörð um almannahagsmuni, hvort sem ég er í meirihluta eða minnihluta," segir Ólafur. Hann segir að borgaryfirvöld viti ekki betur en að væntanlegir kaupendur vilji gera vel og varðveita húsið og tryggja aðgang almennings að Hallargarðinum.

Þá segist Ólafur ekki minnast þess að borgarfulltrúar VG hafi beitt sér fyrir því að falla frá sölunni á Fríkirkjuvegi 11 á meðan þeir voru í meirihluta.