Tjáir sig ekki um formannsframboð

Siv Friðleifsdóttir þingflokksformaður Framsóknarflokksins hefur ekki tekið ákvörðun um hvort hún hyggist bjóða sig fram til formanns flokksins. Hún segir það ekki hafa verið á dagskrá hjá sér en Valgerður Sverrisdóttir núverandi formaður lýsti því yfir í dag að hún ætli sér ekki í formannsframboð.

„Þetta hefur ekki verið á dagskrá hjá mér og ég ætla ekki að tjá mig um þessi mál að svo stöddu," sagði Siv í samtali við Vísi þar sem hún var stödd í Eistlandi á leiðinni upp í rútu.

„Ég er að flytja erindi í Eystrasaltsráðinu svokallaða og kem heim á laugardaginn."

Höskuldur Þórhallsson þingmaður Framsóknarflokksins sagðist alvarlega vera að íhuga formannsframboð í samtali við Vísi í dag. Einnig hefur Páll Magnússon verið nefndur sem hugsanlegur formannsframbjóðandi. Kosið verður á flokksþingi Framsóknarflokksins í janúar.