Boðorð borgarstjórans

Í devteronomion, sem er grísk-latneskt heiti fimmtu Mósebókar, er að finna frásögn af því þegar guð steig niður af himnum í eldstólpa og opinberaðist Móse á Sínaífjalli. Devteronomion merkir annað lögmál. Móse hjó lögmálið á tvær steintöflur og hafa kristin trú og gyðingdómur grundvallast á þeim töflum æ síðan.

Þjóðfélagið hefur vart farið varhluta af því að annað lögmál virðist gilda þessa dagana í Ráðhúsi Reykjavíkur en á öðrum stöðum. Allt annað lögmál.

Boðorð biblíunnar voru samningur guðs og þjóðar hans. Vísir birtir hér úttekt á einhliða samningi Ólafs F. Magnússonar við borgríki sitt og birtir undir heitinu...

Boðorð borgarstjórans

1) Jakob Frímann er vinur þinn. Þú skalt ekki aðra vini hafa

2) Þú skalt ekki leggja nafn borgarstjóra við hégóma (né nokkra góma)

3) Halda skaltu hvíldardaginn heilagan (og gefa okkur vinnufrið til að sinna mikilvægum málefnum sem bíða úrlausnar)

4) Heiðra skaltu Ólaf þinn og Jakob

5) Þú skalt ekki starf auglýsa

6) Þú skalt ekki segja orð

7) Þú skalt ekki kjósa (enda breytir það engu þar sem 6.527 atkvæði duga fyrir stólnum)

8) Þú skalt ekki bera ljúgvitni gegn borgarstjóra þínum

9) Þú skalt ekki girnast Ráðhús borgarstjóra þíns

10) Heiðarleika borgarstjóra í þessum efnum sem og öðrum skal ekki draga í efa

Síðasta og tíunda boðorðið er í boði skrifstofu borgarstjóra.

Í fyrstu Mósebók (32:24) er að finna frásögn af því þegar Jakob glímdi við engilinn og hafði sigur. Ekki er getið um hvort þar hafi verið um Jakob Frímann að ræða eða hver engillinn var í raun en heimildir Vísis herma að hann hafi verið á vegum borgarinnar. Jakob og engillinn glímdu náttlangt og fóru leikar svo að engillinn laust Jakob á mjöðm svo hann gekk úr augnakörlunum. Jakob tók engilinn þá föstum tökum og hélt honum. Segir svo í Mósebók: „Þá mælti hinn: „Slepptu mér, því að nú rennur upp dagsbrún." En hann svaraði: „Ég sleppi þér ekki, nema þú blessir mig." Þá sagði hann við hann: „Hvað heitir þú?" Hann svaraði: „Jakob."."

Var hann þá ráðinn framkvæmdastjóri miðborgarmála.