Tattúeraði Land Rover á öxlina

Davíð Garðarsson bifvélavirki hjá B&L er vafalaust einn harðasti aðdáandi Land Rover bíla á landinu. Hann lætur sér þó ekki nægja að keyra einn slíkan, heldur lét hann á dögunum tattúera Land Rover merkið á aðra öxlina.

Erfitt er að útskýra hvað það er sem heillar svo mjög við tegundina að sögn Davíðs. „Það er eins og að biðja Harley mann um að útskýra hvað sé svona gott við hjólin," segir hann hlæjandi. Bílarnir hafi þó mikinn karakter, og mikill félagsskapur sé í kringum tegundina. Vart sé það pláss á byggðu bóli þar sem ekki finnist Land Rover klúbbur.

Davíð hefur verið mikill áhugamaður um Land Rover bíla í fjölda ára og er einmitt formaður félags Land Rover eigenda á Íslandi. Sjálfur keyrir hann á Range Rover árgerð 1983, og var einmitt á leið á honum upp á hálendi þegar Vísir náði tali af honum.