4 ára fangelsi fyrir að brjótast inn og leita á stúlkubarn

Héraðsdómur Reykjavíkur dæmdi í dag Jóhann Sigurðarson í fjögurra ára fangelsi fyrir að hafa brotist inn á heimili um miðja nótt og leitað á fimm ára gamla stúlku. Jóhann sem er fertugur á langan brotaferil að baki.

Í dómnum kemur fram að tilkynnt hafi verið um innbrot í húsi við Grettisgötu í Reykjavík þar sem leitað hafi verið á stúlkubarn. Stúlkan lá uppi í rúmi hjá ömmu sinni þegar maðurinn byrjaði að klæða hana úr buxunum. Við það vaknaði amman og stúlkan og hljóp maðurinn þá á brott.

Lögreglan hóf strax leit að manninum um nóttina en án árangurs. Lýsing á manninum sem og fingrafar sem fannst á vettvangi passaði þó við Jóhann. Hann neitaði sök allan tímann og segist ekki hafa munað eftir sér frá því hann fór á skemmtistaðinn Grand Rokk umrætt kvöld og þar til hann vaknaði um hádegisbil heima hjá sér.

Fingrafarið fannst þó innan á rúðu við hliðina á útidyrahurðinni sem búið var að brjóta upp. Einnig fannst hráki á tröppum hússins, sem við DNA-rannsókn reyndist vera úr honum. Jóhann gat ekki gefið skýringu á því hversvegna fingrafar hans og hráki hefðu verið á staðnum.

Líkt og fyrr segir er sakaferill Jóhanns nokkuð langur m.a hefur hann verið fundinn sekur um að hafa veist að konu á salerni veitingahúss, farið höndum um líkama hennar, fellt hana í gólfið, barið höfði hennar margsinnis í vegg, dregið buxur hennar og nærbuxur niður að hnjám og farið höndum um kynfæri hennar.

Hann hefur einnig verið dæmdur fyrir að hafa farið í tvígang inn í íbúðarhús um hánótt og tekið fjögurra ára gamalt stúlkubarn sofandi úr rúmi sínu og farið með það út úr húsi um hánótt um miðjan vetur. Jóhann sagðist fyrir dómi, ekki vera haldinn barnagrind.