Knattspyrnuheimurinn er rotinn

Simon Jordan, stjórnarformaður Crystal Palace, dregur upp ófagra mynd af knattspyrnuheiminum í samtali við News of the World í dag. Hann segir knattspyrnuna vera að rotna í spillingu og sýndarmennsku.

Jordan varð á sínum tíma yngsti stjórnarformaðurinn í ensku knattspyrnunni þegar hann keypti Crystal Palace fyrir átta árum og hann hefur aldrei verið þekktur fyrir að sitja á skoðunum sínum.

Hér fyrir neðan má sjá ágrip af því sem Jordan hafði að segja um nokkra áberandi einstaklinga í kring um knattspyrnuna.

Cristiano Ronaldo, Man Utd:

"Ronaldo er bara kjánalegur strákpjakkur sem ætti að virða samning sinn, halda sér saman og spila. Fyrirgefðu snáði, en þú skrifaðir undir fimm ára samning - gerðu það sem þér er sagt!

Menn ofmetnast á því að heyra 60,000 manns kalla nafn þeirra í hverri viku. Ronaldo yrði fljótur að fá leið á því að sitja á bekknum hjá United. Hann áttar sig ef hann verður settur út í kuldann í smá stund."

Frank Lampard, Chelsea (sem er tregur til að framlengja samning sinn við félagið):

"Við lesum um það í blöðunum í hverri viku að fólk geti ekki selt heimili sín og sé komið á hreppinn, en á baksíðunum lesum við um knattspyrnumenn sem hafna samningum sem færa þeim 20 milljónir í vikulaun. Enginn knattspyrnumaður á skilið að fá 20 milljónir á viku - kannski einhverjir skurðlæknar - en ekki knattspyrnumenn."

Sepp Blatter, forseti FIFA (sem líkti knattspyrnumönnum við þræla):

"Það er kominn tími til að breyta viðhorfum forráðamanna í knattspyrnuheiminum til leikmanna. Ef þetta var haft rétt eftir Blatter, er hann bölvað fífl."

Coleen McLoughlin, eiginkona Wayne Rooney:

"Því meira sem ég sé af fréttum af fólki eins og Coleen McLoughlin, sem er bara lítil stelpa frá Liverpool sem fólk heldur að við eigum að sjá sem fyrirmynd - hugsa ég með mér: Hvað í andskotanum er í gangi?"

Umboðsmenn knattspyrnumanna:

"Umboðsmenn eru úrhrök með illt innræti og þeir þrífast bara af því knattspyrnuheimurinn er svo spilltur."