Stefán Þór: Ég fór í boltann

Stefán Þór Þórðarson segir engan vafa leika á því að hann hafi farið í boltann þegar hann fékk síðara gula spjaldið sitt í leik ÍA og Keflavíkur í gær.

Stefán fékk gult spjald strax á sjöttu mínútu leiksins og svo aftur gult á 83. mínútu leiksins og þar með rautt. Lesendur geta sjálfir dæmt um brotin með því að smella á fréttina hér að neðan en sjálfur segir Stefán að síðara spjaldið hafi ekki verið réttlætanlegt.

„Ég fór í boltann og spilaði honum til samherja míns," sagði Stefán í samtali við Vísi. Hann sagðist ekki hafa fengið aðvörðun fyrir seinna gula spjaldið og því hafi ekki um uppsafnað brot verið að ræða.

„Ég ætla annars ekki að ræða frekar um þetta og bendi á Guðjón Þórðarson þjálfara," sagði Stefán. Guðjón sagði að dómari leiksins hefði beitt Stefán ofbeldi með því að gefa honum rauða spjaldið og einnig að dómarar hefðu fundað fyrir leikinn um hvernig ætti að taka á Skagamönnum og þá sérstaklega Stefáni.

Ólafur Ragnarsson, dómari leiksins, sagðist í samtali við Vísi í dag standa heilshugar við bæði spjöldin sem hann gaf Stefáni.