Fagna ákvörðun um að hefja hrefnuveiðar

Hagsmunaaðilar í sjávarútvegi fagna þeirri ákvörðun sjávarútvegsráðherra að hefja skuli hrefnuveiðar. Þeir segja þá ákvörðun vera í samræmi við stefnu stjórnvalda um sjálfbæra nýtingu lifandi auðlinda hafsins og ályktun Alþingis um hvalveiðar frá 10. mars 1999.

„Ástand hvalastofna við Ísland er gott og er það staðfest af helstu vísindamönnum á sviði hvalarannsókna. Stærð hrefnustofnsins hefur verið talin nálægt sögulegu hámarki, en samkvæmt nýjustu talningu voru um 44.000 hrefnur á landgrunninu við Ísland. Hafrannsóknastofnunin hefur lagt til veiðar á allt að 400 hrefnum og er það mat stofnunarinnar að slíkur fjöldi samrýmist markmiðum um sjálfbæra nýtingu.

Undrast afstöðu Samfylkingarinnar

Ekki er annað hægt en að lýsa yfir undrun á þeirri afstöðu sem komið hefur fram af hálfu forystumanna Samfylkingarinnar í málinu um að meiri hagsmunum sé fórnað fyrir minni. Þar vega hagsmunir helsta útflutningsatvinnuvegar þjóðarinnar, sjávarútvegsins, lítið," segir í tilkynningu frá LÍÚ, Sjómannasambandinu, Félagi skipstjórnarmanna og Félagi vélstjóra og málmtæknimanna.

Hagsmunaaðilar segja að hrefnur og aðrir hvalir sem haldi til hér við land éti um sex milljónir tonna af fæðu á ári hverju, en af þessari fæðu séu rúmlega tvær milljónir tonna fiskur. Hrefnan sé atkvæðamesti afræninginn bæði hvað varðar heildarmagn, sem sé um tvær milljónir tonna og fiskát, en talið sé að hrefnur éti um eina milljón tonna af fiski á ári, m.a umtalsvert magn af loðnu og þorski, en ýmislegt bendi til að hlutdeild eldri þorsks í fæðu hrefnunnar sé meiri en gert hafi verið ráð fyrir áður.