Tveir teknir með fíkniefni á Vestfjörðum í gær

Lögreglan á Vestfjörðum handtók í gær tvo menn sem voru að koma með áætlunarflugi til Ísafjarðar frá Reykjavík. Þeir voru grunaðir um að hafa fíkniefni í fórum sínum. Við leit á mönnunum fannst lítilræði af kannabisefnum og ætluðu amfetamíni. Mönnunum var sleppt að yfirheyrslu lokinni. Þeir hafa báðir komið við sögu lögreglu áður.

Í tilkynningu frá lögreglunni segir að á árinu 2008 hafi lögreglunni á Vestfjörðum orðið vel ágengt í fíkniefnaeftirliti. Það sem af er þessu ári hafi lögreglan lagt hald á 800 grömm af fíkniefnum í 41 haldlagningu. Til samanburðar hafi að meðalatali verið lagt hald á um 220 grömm af fíkniefnum í 22 haldlagningum, undanfarin 5 ár.

Lögreglan á Vestfjörðum hvetur almenning til að vera vel á varðbergi og veita allar upplýsingar um fíkniefnameðhöndlun, því ekkert verði gefið eftir gagnvart fíkniefnadreifingu í umdæminu.

Þeim sem hafa slíkar upplýsingar er vinsamlegast bent á að hafa samband í síma lögreglunnar á Vestfjörðum 450 3730 eða símsvara lögreglunnar og tollgæslunnar á landsvísu 800 5005.