Að dæma fegurð er flókið mál

„Að dæma fegurð getur verið flókið mál því eins og við vitum öll þá höfum við ekki sama smekk og upplifum fegurð mismunandi. Sem betur fer," segir Guðrún Möller fyrrverandi fegurðardrottning Íslands en hún er ein af dómurum sem velja fegurstu stúlku Íslands 2008 úr hópi 21 stúlkna sem keppa um titilinn Ungfrú Ísland í kvöld.

„En ef við einangrum þetta við að velja Fegurðardrottningu Íslands þá verð ég að segja fyrir mitt leyti að hún þarf að hafa þessa klassísku fegurð utan sem innan."

„Hún þarf að hafa eitthvað auka sem veldur því að eftir henni er tekið. Hún þarf að samsvara sér vel líkamlega, bera sig vel og mér finnst líka skipta máli að hún sé tilbúin í það að fara í fegurðarsamkeppni með því markmiði að sigra og sigra enn frekar þegar komið er í stórar keppnir erlendis."

„Umfram allt held ég líka að þegar konu líður vel þá kemur alltaf þessi útgeislun sem skiptir máli og mikið er talað um að fegurðardrottning verði að hafa. Að vera góð fyrirmynd fyrir ungar dömur skiptir miklu máli."