Raddir fyrir Tíbet í Salnum

Næst komandi sunnudagskvöld verða haldnir styrktartónleikar í Salnum í Kópavogi undir yfirskriftinni Raddir fyrir Tíbet.

,,Pælingin með tónleikunum er að efla menningartengsl á milli Tíbeta og Íslendinga og halda uppi rödd fyrir Tíbeta en það er verið að murka úr þeim lífið," segir Jón Tryggvi Unnarsson. 

Allur ágóðinn af tónleikunum mun renna til flóttamannamóttöku í Indlandi.

"Það eru þúsundir Tíbeta sem flýja yfir Himalæja í Pumastrigaskóm, ef þeir eiga þá, og komast til Indlands við illan leik."

KK, Svavar Knútur, Jónas Sigurðsson, Páll Óskar & Monica og Jón Tryggvi koma fram á tónleikunum. Auk þess munu Birgitta Jónsdóttir, Ögmundur Jónasson og Teswang flytja ávörp. Teswang er stjórnmálafræðingur frá Tíbet.

Tónleikarnir hefjast klukkan 20 og fer miðasala fram á salurinn.is og midi.is.

,,Miðaverð er 2000 krónur sem er gjafaprís," segir Jón Tryggvi.