Óttarr Proppé: Bannað að tala um launin

,,Þessi hugmynd kom upp hjá Vodafone að taka þennan pönkvinkil," svarar Óttarr Proppé söngvari hljómsveitarinnar Rass sem fer með aðalhlutverkið í auglýsingaherferð Vodafone þar sem hún tekur lagið Skítt með kerfið.

,,Einhverjir sem unnu við þetta höfðu hlustað mikið á Rassinn meðan þeir voru að vinna hugmyndina og okkur fannst þetta tilvalið því hugmyndin er að vera í hrópandi andstöðu og hrópa sem hæst."

Nú spilar Pétur Jóhann Sigfússon leikari á trommur með ykkur. Er hann nýr meðlimur hljómsveitarinnar Rass?

,,Nei hann er ekki meðlimur í bandinu en allt of stór hluti af Rassinum var staddur erlendis eða ófáanlegur til að taka þátt. Þetta var gert í pönki með engum fyrirvara. Pétur Jóhann lærði á trommur í Tónlistarskóla Garðabæjar og var þar mjög óánægður að þurfa að lemja á borð heilan vetur en hann er dálítill pönkari í sér og fékk því að spila á trommur með okkur."

Máttu upplýsa lesendur Vísir.is um launin sem þið fenguð fyrir framtakið?

,,Nei ég má það nú ekki en þau eru í rauninni aukaatriði enda ekki aðalatriðið í pönkinu. Það sem kallaði á okkur var að við fengum að krukka í textanum. Við vorum með í því að semja textann og þeir komust að því að þeirra attitude var á sömu bylgjulengd og okkar."

,,Það á örugglega eftir að heyrast fleiri hróp frá okkur áður en langt um líður," segir Óttarr að lokum.

Sjá myndbandið Skítt með kerfið hér.

Sjá Pétur Jóhann læra á trommur hér.

Auglýsinguna má svo sjá hér.