Starfsmenn Morgunblaðsins fá laun í vikunni

Kristín Heiða Kristinsdóttir trúnaðarmaður starfsmanna á Morgunblaðinu segist ekki vita betur en að það eigi að greiða starfsmönnum blaðsins laun í vikunni. Vegna fjárhagserfiðleika Árvakurs, útgáfufélags Morgunblaðsins, var ekki hægt að greiða öllum laun nú um mánaðarmótin.

„Ég veit ekki betur en að það hafi gerst í dag og í gær. Þeir sögðu að það yrði gert í þessari viku og við treystum því," segir Kristín Heiða í samtali við Vísi.

Hún segir engan hafa kvartað við sig í dag og gerir því ráð fyrir að búið sé að ganga frá launagreiðslum.

Í fréttum undanfarinna daga hefur verið sagt frá erfiðleikum Morgunblaðsins og hugsanlegum kaupendum á blaðinu. Meðal annars hefur Hreinn Loftsson eigandi Birtíngs, sem gefur út DV, lýst yfir áhuga á að eignast blaðið.