Hefðin og arfleifðin - Arnaldur í viðtali hjá The Times

„Bækur Arnalds veita innsýn í hið sérstaka hugarfar Íslendinga og það virðast lesendur um gervallan heiminn kunna að meta," skrifar Doug Johnstone, blaðamaður hjá The Times og rithöfundur að auki, í viðtali sem hann tók við Arnald Indriðason og birtist í blaðinu á föstudaginn.

Johnstone hefur það eftir Arnaldi, sem hann ræddi við á kaffistofu Norræna hússins, að Íslendingar hafi í raun ekki átt sér neina glæpasagnahefð. Ekki hafi verið litið á glæpasögur sem bókmenntagrein heldur hafi þær verið álitnar hálfgert hrat og ekki par vitrænar. Johnstone veltir því fyrir sér hvort einhver hafi sagt þetta upp í opið geðið á Arnaldi og lýsir honum sem manni með mikla nærveru og alvarlegt svipmót sem þó sé vingjarnlegur í fasi og hafi þægilegan talanda.

Fortíðarást með framtíðarsýn

„Bækur Arnalds gefa ágæta sýn á félagslega og pólitíska þróun íslensks samfélags síðustu tveggja kynslóða, samfélags sem reynir eftir megni að samþætta ást á arfleifð sinni og örar breytingar á tækni, auði og iðnaði og þar með að kveikja fortíðarást sem þó á sér framtíðarsýn," skrifar Johnstone og vitnar í skoska glæpasagnahöfundinn Ian Rankin sem einhvern tímann sagði að sá sem vildi kynnast þjóð skyldi lesa glæpasögur hennar.

Johnstone fjallar um persónu Erlends Sveinssonar lögreglumanns, meginsöguhetju Arnalds, og segir hann vera annað og meira en miðaldra skaphund. Erlendur sýni fórnarlömbunum á sögusviðinu ríka samúð en fyrir burðist hann þó með nægan tilfinningalegan farangur þar sem bróðir hans hafi týnst í ofsaveðri þegar þeir voru börn og jarðneskar leifar hans aldrei komið fram.

Fleiri bækur um Erlend

Arnaldur segist í viðtalinu eiga ýmsum norrænum glæpasagnahöfunum skuld að gjalda og nefnir Peter Høeg, Henning Mankell og rithöfundahjónin Maj Sjöwall og Per Wahlöö sem skópu sögurnar af Martin Beck en sögusvið þeirra er Stokkhólmur á sjöunda og áttunda áratug síðustu aldar.

Johnstone klykkir út með þeim orðum Arnalds að hann þyrsti í að kynnast Erlendi betur: „Það koma fleiri bækur um hann, alveg þar til ég hef lokið sögu hans og tel tímabært að kveðja hann. En ég veit ekki hvenær það verður því hann er mér enn ráðgáta," segir Arnaldur.

Viðtalið í heild sinni má lesa hér.