Evra ákærður eftir átökin á Stamford Bridge

Franski varnarmaðurinn Patrice Evra hjá Manchester United hefur verið ákærður fyrir ósæmilega hegðun af enska knattspyrnusambandinu eftir áflog sem brutust út eftir leik Chelsea og Manchester United þann 26. apríl sl.

Þá hefur vallarvörður Chelsea einnig verið kærður vegna atviksins, en niðustaða sambandsins í dag var byggð á þriggja mánaða rannsókn.

Nokkrir leikmenn United voru að skokka við völlinn þegar verið var að ganga frá eftir leik liðanna og lenti þeim saman við vallarstarfsmenn Chelsea.

Atvikið náðist á myndband og var ákæran að hluta byggð á myndbandinu auk þess sem rætt var við vitni í málinu.

Rio Ferdinand hafði einnig verið kallaður inn á teppi vegna annars atviks sem átti sér stað eftir leikinn, en hann var sakaður um að hafa sparkað í starfsmann Chelsea. Hann slapp með áminningu eftir að sannað þótti að um óviljaverk hafi verið að ræða.