Stuðningsmenn Tottenham eiga stað í hjarta mínu

Framherjinn Robbie Keane vill ekki meina að hann hafi brugðist stuðningsmönnum Tottenham þegar hann fór fram á félagaskipti sín til Liverpool á dögunum.

"Ég held að ég hafi ekki brugðist stuðningsmönnum Tottenham. Ég átti sex frábær ár hjá félaginu og gaf allt í hvern einasta leik. Ég geri alltaf mitt besta og það mun ekki breytast. Stuðningsmenn Tottenham voru mér alltaf frábærir og þeir munu alltaf eiga stað í hjarta mínu. Nú er komið að nýjum kafla í lífi mínu en ég er þakklátur stuðningsmönnum Tottenham," sagði Írinn.

Hann hefur ekki áhyggjur af framtíð Lundúnaliðsins, en þar hefur Juande Ramos verið að taka til undanfarin misseri.

"Það eru nokkrir leikmenn að fara frá Tottenham, en það eru líka nokkrir góðir að koma í staðinn. Ég get hinsvegar bara einbeitt mér að Robbie Keane og því sem hentar mér best," sagði framherjinn.