Fólk sem hafi fryst lán sín leggi fyrir

Það er gríðarlega mikilvægt að þeir sem hafa fryst erlendu lánin sín, leggi vel til hliðar, segir Edda Rós Karlsdóttir, hagfræðingur hjá Landsbankanum. Mikilvægt sé að átta sig á að mismunurinn er ekki gróði.

Edda Rós segir að nokkur áhætta sé fólgin í því að frysta afborganir af erlendum íbúðalánum strax enda ekki hægt að útiloka að krónan verði enn veikari en hún er nú þegar frystingu lýkur.

Algengt er að frysting gildi í fjóra mánuði. Útfærslan er misjöfn milli banka. „Þetta er viss áhætta," segir Edda Rós sem leggur ríka áherslu á að þeir sem taka ákvörðun um að frysta lán haldi áfram að leggja til hliðar sem nemur afborgun af láninu, til dæmis í júní, þegar ástandið á gjaldmiðlinum var eðlilegra.

Sérfræðingar sem Markaðurinn hefur rætt við í morgun segja margir hverjir einkennilegt að ekki hafi verið sett í skilmála að þeir sem gætu legðu til hliðar peninginn sem hefði annars farið í afborganir. Farið verður betur yfir málið í kvöldfréttum Stöð 2 klukkan 18.30.