Riise skrifaði stuðningsmönnum Liverpool

Norðmaðurinn John Arne Riise hefur ritað stuðningsmönnum Liverpool opið bréf sem birtist á heimasíðu félagsins. Þar þakkar varnarmaðurinn "bestu stuðningsmönnum í heimi" fyrir stuðninginn í þau sjö ár sem hann spilaði með Liverpool.

"Ég hlakka til þess að spila með nýja liðinu mínu Roma, en ég hef hugsað um stuðningsmenn Liverpool á hverjum degi. Ég fékk aldrei tækifæri til að kveðja stuðningsmennina með formlegum hætti og því geri ég það með þessu bréfi. Ég mun halda áfram að fylgjast með Liverpool frá Ítalíu og ég vona að stuðningsmenn Liverpool fylgist áfram með mér," sagði meðal annars í bréfi Riise.