Dagur fer á flokksþing Demókrata

Dagur B. Eggertsson, oddviti Samfylkingarinnar í Reykjavík, er á leið til Denver í Colorado þar sem hann mun verða viðstaddur flokksþing Demókrataflokksins. „Þetta er mjög spennandi en þetta er auðvitað gríðarlega stór viðburður á alla kanta," segir Dagur.

„Það er spurning hvort séu að verða vatnaskil í því hvernig stjórnmálin í Bandaríkjunum eru byggð upp og virka," segir Dagur. „Þetta hefur gengið mikið út á peninga og fjölmiðlaumfjöllun hingað til og gerir reyndir ennþá, en Obama hefur einnig tekist að virkja grasrótina og unga fólkið í miklu meira mæli en nokkur annar hefur gert," segir Dagur.

Aðspurður hvorn frambjóðandann hann hafi stutt í kosningabaráttunni Obama eða Hillary Clinton segir Dagur: „Ég hef raunar dáðst að Hillary í gegnum árin. Bróðir minn býr hins vegar í Bandaríkjunum og hann og hans kona voru eldheitir stuðningsmenn Obama þannig að það var beinlínis ekki vinsælt að viðra aðrar skoðanir inna fjölskyldunnar á meðan á baráttunni stóð því hún var geysilega hörð á köflum!," segir Dagur og bætir því við að nú verði áhugavert að sjá hvernig flokknum tekst að „brúa bilið á milli þessara tveggja fylkinga og ná einum sameinuðum flokki út úr þessum landsfundi. Það er algjört lykilatriði ef á að vinna þennan harða slag sem er framundan."

Dagur segist gera sér litlar vonir um að hitta Barack Obama á fundinum. „Ég geri mér engar vonir um það og ætla bara að stilla slíkum væntingum í hóf. Ég ætla bara að sjá og hlusta og læra, því það er auðvitað mjög mikið af áhugaverðu fólki á þessari samkomu," segir Dagur en bætir því við að hann hafi reyndar hitt varaforsetaefnið Joe Biden árið 2003.